Zulkuf Gezen li ser gora xwe hate bibîranîn

Girtiyê siyasî Zulkuf Gezen ku par di 16’ê adarê de ji bo rakirina tecrîda li ser Ocalan çalakiya fedaî pêk anîbû, îro bi merasîmekê hate bibîranîn

Girtiyê siyasî Zulkuf Gezen ku li Girtîgeha Tîpa F ya Tekîrdagê dihat girtin, ji bo protestokirina tecrîda girankirî ya li ser Rêberê Gelê Kurd Abdullah Ocalan, di 16’ê adara 2019’an de çalakiya fedaî pêk anî. Gezen li ser gora xwe ya Goristana Yenîkoyê ya Rezan a Amedê hate bibîranîn.

Di merasîma bîranînê de dayika Gezen, Havva Gezen, hevseroka KCD’ê Leyla Guven, parlamenterên HDP’ê Dêrsim Dag, Mûsa Farisogûllari, Semra Guzel û nûnerên MEYA-DER, TJA û Meclisa Dayikên Aştiyê amade bûn.

Leyla Guven di merasîmê de axivî û diyar kir ku bi saya berxwedana Zulkuf Gezen, Ayten Beçet, Zehra Saglam, Yonca Akici, Sîraç Yuksek û Mahsûm Pomay tecrîd hatiye şikandin. Guven wiha domand: “Zulkuf û hevalên wî dizanibûn ku tecrîd sûcekî mirovayetiyê ye û ji ber vê çalakiyek li dar xistin. Di şexsê rêzdar Ocalan de li ser hemû gel, jin û ciwanan tecrîd hebû.”

Dayik Havva Gezen jî di merasîmê de ev tişt destnîşan kir: “Bila êdî tecrîda li ser rêzdar Ocalan were rakirin. Bila kurd li hemberî vê zilmê çavên xwe vekin. Zulkuf çû lê bila ciwanên wekî wî êdî nemirin. Êdî em bibin yek û em hay ji hêza xwe hebin.” AMED

Dikarî Biecibînî