TUAY-DER’ê xwest ku heyeteke tenduristiyê biçe Îmraliyê

TUAY-DER’ê bi daxuyaniyekê xwest ku heyeteke serbixwe biçe Îmraliyê. Her wiha TUAY-DER’ê destnîşan kir ku divê tevî girtiyên siyasî, hemû girtî di zûtirin dem de bên berdan

Komeleya Alîkarî û Piştevaniya Malbatên Girtiyan (TUAY-DER) têkildarî rewşa dawîn a vîrusa koronayê ya li girtîgehan daxuyaniyeke niviskî da.

TUAY-DER’ê diyar kir ku li gelek girtîgehan şertên paqijiyê pêk nayên û ev agahî dan: “Qawîş bi awayeke rêk û pêk nayên dezenfektekirin. Amûrên paqijiyê kêm in. Saetên hewa girtinê bi sînor in û ava germ bi awayekî rêk û pêk nayê dayîn. Heta niha li Tirkiyeyê di 670 kesan de vîrûsa koronayê hatiye tespîtkirin û 9 kesan jî ji ber vîrûsê jiyana xwe ji dest daye. Em dixwazin ku wezareta tenduristiyê têkildarî rewşa girtîgehan daxuyaniyekê bide û diyar bike bê ka vîrûs li girtîgehan belav bûye yan na.”

Daxuyanî wiha bi dawî bû: “Weke ku tê zanîn birêz Abdullah Ocalan ev 21 sal in li Girtîgeha Îmraliyê girtî ye û hevdîtinên bi telefonê çênabin. Em daxwaz dikin ku bi birêz Ocalan û girtiyên din ên Îmraliyê re jî hevdîtina bi telefonê pêk bê û heyeteke tenduristiyê ya serbixwe ku rêxistinên tenduristiyê jî di nav de hebin, biçe Îmraliyê. Girtî û hikûmxwarên siyasî ji sererastkirina înfazê ya nû sûdê nagirin. Em dixwazin ku di serî de girtiyên siyasî, hemû girtî bên berdan.” AMED

Dikarî Biecibînî