Gorên elewiyan ên li Aydinê hatin rûxandin

Gorên elewiyan ên li Goristana Navçeya Koşkê ya Aydinê ji hêla kesên nediyar ve hatin rûxandin

Gorên Elewiyan ên li goristina navçeya Koşk a Aydinê hatin rûxandin. Malbatên ku di 24’ê adarê de çûn serdana goristanê, dîtin ku gor hatine rûxandin. Li ser vê yekê jî malbatan serî li midûriyeta emniyetê da.

Di nava gorên kêlên wan hatin şikandin de, gora yek ji pîrên Ocaxa Mansûr Baba ya gundê Tosniyê yê navçeya Pilûmir a Dêrsimê Seyît Alî Comert ku di sala 1938’an de ji Komkujiya Dêrsimê bi saxî rizgar bûbû û piştre hatibû sirgûnkirin jî heye.

Zarokên Seyît Alî Comert ku di sala 1941’an de jiyana xwe ji dest dabû û li goristana navçeya Koşkê hatibû definkirin, piştî derketina qanûnê careke din vegeriyabûn gundê xwe yê li Dêrsimê. Kurê Comert, Mûsa Comert ji gundê Tosîniye vedigere gundê Guleç ê girêdayî navenda Dêrsimê û piştî bi salan, di sala 1974’an de careke din vedigere Aydinê.

Mûsa Comert di sala 1994’an de di qezayekê trênê de jiyana xwe ji dest da û cenazeyê wî li goristana navçeya Koşkê li kêleka gora bavê xwe Seyît Alî Comert hate definkirin. Hevjîna Mûsa Comert, Şahhanim Comert jî di 21’ê adara 2020’an de jiyana xwe ji dest da û li kêleka gora Mûsa Comert hate definkirin. Xizmên Şahhanim Comert ên ku tev li merasîma cenazeyê bûn diyar kirin ku heta roja merasîma definkirinê jî gor nehatibûn rûxandin. AYDIN

Dikarî Biecibînî