KNK: Qazî Mihemed weke sembolekê cihê xwe di dîrokê de girt

KNK'ê bi boneya 73’yemîn salvegera şehadeta serokê Komara Kurdistanê Qazî Mihemed û rêhevalên wî daxuyaniyek da û bi bîr anîn. KNK’ê got; “Ew hewl û cangoriya ser û pêşengên komarê ji bo me û dîrokê bûne mînak û ders û Pêşewa Qazî Mihemed jî, wek sembolekî mezin di nava berperên dîrokê de cihê xwe girt û hat nivîsandin.”

Navenda Nûçeyan |

Konseya Rêveber a Kongreya Neteweyî ya Kurdistanê (KNK) ji ber salvegera darvekirina serokê Komara Kurdistanê Pêşewa Qazî Mihemed û hevalên wî daxuyaniyeke nivîskî weşand.

Daxuyaniya KNK’ê wiha ye:

“Berî 73 salan weke îro, di 31’ê adara 1947’an de piştî têkçûna Komara Kurdistanê li Mehabadê, damezirîner û serokê Komara Kurdistanê Pêşewa Qazî Mihemed, Wezîrê Parastinê û Cîgirê Serokkomar Seyf Qazî û nûnerê Mehabadê li Parlamentoya Îranê û nûnerê Qazî Mihemed li Tehran Sadr Qazî, li sêdarê dan.

Ew heyama nêzî salekê bû, Komara Kurdistanê hatibû îlankirin û destketên mezin ên rêxistina civaka kurdî, ferheng û çand, perwerde û hînkarî, aborî û bi giştî sazîkirina dewletdariyê tê de. Lê mixabin bi palpiştiya kolonyalîzma nevneteweyî û êrîşên dewleta dagirker a Îranê, dawî bi komarê hat. Bi wê jî nesekinîn heta damezirîner û serokê wê jî li sêdarê dan. Dîsan bi plan û planên kolonyalîzma navneteweyî ew xewn û hêviyên rizgarî û azadiyê wek mafên rewa yên kurd binpê kirin û di wê parçeya Kurdistanê de dagirkerî heta roja îro domandin û berdewam dikin.

Di wê demê biryardan û îlankirina dewleta serbixwe, bi navê Komara Kurdistanê biryareke siyasî û civakî ya wêrek û çavnetirsane bû, di nava wan şert û mercên giran ên bi dawîhatina Şerê Duyemîn ê Cîhanê de. Lew ew hewl û cangorî ya ser û pêşengên komarê ji bo me û dîrokê bûne mînak û ders û Pêşewa Qazî Mihemed jî, wek sembolekî mezin di nava berperên dîrokê de cihê xwe girt û hat nivîsandin.

Îro jî li hemberî desthilatdariya rejîma Îranê, ciwanên kurd, jinên kurd, bi rêxistin û saziyên xwe yên siyasî, civakî û leşkerî têkoşîneke destanî didine meşandin. Hemberî ku Melayên Îranê, cezayê dardekirina ciwanên kurd bi kar tîne, ciwanên kurd di zindanan de rehîn digire û di bin navê kasibkariyê de komkujiyan pêk tîne jî, gelê kurd têkoşîna xwe, bi xwedî derketina li doza Qazî Mihemed û hevalên wî didomînin.

Em weke KNK’ê, di bîranîna 73 saliya li sêdaredana pêşewa Qazî Mihemed, Seyf Qazî, Sadr Qazî û hemû şehîdên Kurdistanê carekê din bi rêz û hurmet bîr tînin û li ber bîranîna wan bejna xwe ditewînin. Herwiha sêrî de dakirkerên rejîma Îranê û hemû dakirkerên Kurdistanê bi tundî şermezar dikin.”

Dikarî Biecibînî