Li girtîgeha Bafrayê girtiyek bi vîrûsa koronayê mir

Girtiyê bi navê Mehmet Yeter ku li Girtîgeha Tîpa T a Bafra ya Samsunê dima, ji ber vîrûsa koronayê jiyana xwe ji dest da

Di girtîgehên bakurê Kurdistanê û Tirkiyeyê de zêdetirî 300 hezar girtî û hikûmxar hene. Ji ber vîrûsa koronayê (Covîd-19) jiyana girtiyan di bin gefeke mezin de ye. Ji bo rewşa girtiyan her çiqas hikûmeta AKP-MHP’ê pêşnûmeya qanûna înfazê amade kiribe jî, di vê pêşnûmeyê de cih nedaye girtiyên siyasî. Di dema ku pêşnûme li meclisê tê nîqaşkirin de hikûmxarekê ji ber vîrûsa koronayê jiyana xwe ji dest da.

Li gorî nûçeya rojnameya Cumhuriyetê, girtiyê bi navê Mehmet Yeter (70) ê li Girtîgeha Tîpa T a Bafra ya Samsûnê, hefteyek berê ji ber vîrûsa koronayê jiyana xwe ji dest da. Hat diyarkirin ku nexweşiya şekirê bi Yeter re hebû û di 16’ê adara de rakirin Nexweşxaneya Fakûlteya Tipê ya 16’ê Gulanê. Di 23’yê adarê de lingê Yeter ê çepê tê birîn û di 26’ê adarê de vediguhêzînin girtîgehê. Lê Yeter piştre careke din radikin nexweşxaneyê. Yeter vêcarê li nexweşxaneyê jiyana xwe ji dest dide.

Di nivîsa Serdozgeriya Komarê ya ji Midûriyeta Goristanan a Şaredariya Bajarê Mezin a Samsunê re hatiye şandin de wiha tê gotin: “Hikûmxarê bi navê Mehmet Yeter ji ber nexweşiya Covîd-19 wefat kir. Me nekarî em xwe bigihînin malbata wî. Yeter ji ber şewba vîrûsa koronayê miriye û ji bo ku tenduristiya civakê nekeve xetereyê û nexweşî belav nebe, divê bergiriyên pêwîst bên girtin û wisa bê definkirin.”

Cenazeyê Mehmet Yeter piştî nivîsa serdozgeriyê, ji aliyê ekîbên Miduriyeta Goristanan ve hat definkirin. Malbata Yeter jî got ku cenazey beriya wan hatiye definkirin û agahiya mirinê jî 5 roj piştre jê re hatiye ragihandin. ENQERE

Dikarî Biecibînî