Partiyên Yekitiya Niştimanî ya Kurd komîteyek ava kir

Hevserokê Partiya Aştiyê ya Demokratîk a Kurdistanê da zanîn ku di bin sîwana Partiyên Yekitiya Niştimanî ya Kurd de komîteyeke ji 7 kesan pêk tê ava kirine. Mihemed da zanîn ku karê komîteyê ew e ku bi hemû nûnerên civakê re hevdîtinan bike

Li rojavayê Kurdistanê duh bi armanca yekkirina refa kurdî, bi tevlêbûna 25 partî û tevgerên siyasî yên kurd Partiyên Yekitiya Niştimanî ya Kurd hate avakirin. Yek ji van partiyan jî Partiya Aştiyê ya Demokratîk a Kurdistanê ye. Têkildarî mijarê hevserokê partiyê Telal Mihemed ji ANHA’yê re axivî.

Mihemed diyar kir ku Fermandarê Giştî yê HSD’ê Mazlum Ebdî ji bo ku helwest û xîtaba kurdan li Rojava û Sûriyeyê bibe yek, înîsiyatîfek dest pê kir û wiha got: “Piştî wê înîsiyatîfê gelek hevdîtin di navbera hêz û partiyên kurdî de çêbûn. Partiyên Yekitiya Niştimanî ya Kurd dê ji bo pêkanîna yekitiya neteweyî bi partî, hêz û rêxistinên li herêmê re têkiliyan deyne.”

Mihemed herî dawî jî wiha got: “Armanca vê qonaxê ya esasî yekkirina ref û xîtaba kurdî ye. Me komîteyeke ji 7 kesan pêk tê ava kir û erka wê jî ew e ku bi navê 25 partiyan peywendiyê bi hemû partî û rêxistinan re deyne. Di hemû civîn û çalakiyên ji bo pêkanîna yekitiya niştimanî de dê nûnertiyan her 25 partiyan bike. Em ê bêyî ferq û cudahî bi hemû partiyan re têkiliyan deynin.”

Tê payîn ku komîte dê di rojên pêş de dest bi karê xwe bike. QAMIŞLO

Dikarî Biecibînî