Malbatên Tîmtîk û Unsal ên di rojiya mirinê de bang kir

Çalakiya rojiya mirinê ya parêzer Aytaç Unsal û Ebrû Tîmtîk a ji bo darizandineke adilane didome. Têkildarî mijarê malbatên wan daxuyaniyek da û bang li raya giştî kirin ku xwedî li zarokên wan derkevin

Navenda Nûçeyan |

Parêzer Aytaç Unsal û Ebrû Tîmtîk ji bo darizandineke adilane di 5’ê sibata îsal de dest bi greva birçîbûnê kirin. Her du çalakvanan di 5’ê nîsanê Roja Parêzeran de jî çalakiya xwe veguherandibûn rojiya mirinê. Têkildarî mijarê malbatên her du parêzeran daxuyanî dan.

Di daxuyaniyê de malbatan bang li parêzvanên mafên mirovan û raya giştî kirin û xwestin ku bi hevre li parêzeran xwedî derkevin. Malbatan diyar kirin ku heke bi hev re li zarokên xwe xwedî derkevin û mafê wan biparêzin, dikarin wan rizgar bikin. Malbatan da zanîn ku bêyî cara dawî îfadeya parêzeran bigirin, li Barkin Tîmtîk 18 sal û 9 meh, li xwişka wî Ebru Tîmtîk 13 sal û 6 meh û li Aytaç Unsal jî 10 sal ceza hatiye birîn.

Malbatan anî ziman ku parêzerên ketine greva birçîbûnê zû kîloyê didin û têkildarî rewşa Ebru Tîmtîk ev agahî dan: “Rewşa wê ya tenduristiyê her ku diçe xerabtir dibe. Di hevdîtina dawî de hevokên xwe komî ser hev nedikirin. Bi taybetî şewba koronayê li Girtîgeha Sîlîvriyê belav bûye. Ji bo tevdîrê jî tiştek nayê kirin. Em bi hev re dengê xwe bilind bikin û li mafê wan xwedî derkevin. Bi vî awayî em dikarin zarokên xwe rizgar bikin.”

Dikarî Biecibînî