Qetilkirina Çakan bi stranên kurdî şermezar kirin

HDP û Meclisa Ciwanan li Edeneyê qetil kirina Bariş Çakan şermezar kir. Di daxuyaniyê de hat gotin ku sedema vê encamê, desthilatdarî ye. Çalakvanan herî dawî jî stranên kurdî gotin

Partiya Demokratîk a Gelan (HDP) a Edeneyê û Meclisa Ciwanan ji bo Bariş Çakan ku ji ber guhdarkirina stranên kurdî li Enqereyê hatibû qetilkirin, stranên kurdî strîn. Polîsan bi hinceta vîrûsa koronayê xwestin çalakiyê asteng bikin. Bi vê boneyê jî ketina avahiya HDP’ê û derdora wê bi wesayîtên zirxî dorpêç kirin. Li gel hemû astengiyên jî HDP’iyan çalakiya xwe li dar xist.

Di daxuyaniyê de hevserokê HDP’ê yê Seyhanê Enver Guler axivî û diyar kir ku kuştina Çakan, encama polîtîkaya pişaftinê ya li dijî gelê kurd e. Hevserokê HDP’ê yê bajar Mehmet Karakiş jî qetilkirina Çakan weke nîşaneya nîjadperestî û faşîzmê nirxand û wiha got: “Yê ku hatiye kuştin ne tenê mirovek, pêşeroja me jî bû her wiha. Sedema vê encamê, polîtîka û gotinên desthilatdariyê ne.”

Çalakî bi gotina strana Aram Tîgran a ‘Zimanê Kurdî’ bi dawî bû. EDENE

Dikarî Biecibînî