Der barê rojnameger Akdenîz de lêpirsîn hate destpêkirin

Buroya Sûcên Çapemeniyê ya Serdozgeriya Komarê ya Amedê der barê nûçegihanê MA’yê Lezgîn Akdenîz de ji ber nûçeya wî ya têkildarî cihêkariya di navbera perestgehan de, lêpirsîn da destpêkirin. Li ser vê yekê Akdenîz li emniyetê îfade da

Buroya Sûcên Çapemeniyê ya Serdozgeriya Komarê ya Amedê der barê nûçegîhanê Ajansa Mezopotamyayê (MA) Lezgîn Akdenîz de lêpirsîn da destpêkirin. Hat zanîn ku serdozgeriyê bi hinceta nûçeya ku der barê qeyûmê Amedê ya cihêkarî di navbera perestgehan de dikir hatiye çêkirin, lêpirsîn daye destpêkirin.

Dema yekineyên Serokatiya Daîreya Kontrola Parastina Derdorê ya Şaredariya Bajarê Mezin a Amedê di 14’ê adarê de perestgeh dezenfekte dikirin, tenê mizgeft dezenfekte kirin û dêr û cemxane dezenfekte nekirin. Rojnameger Akdenîz jî bi sernavê; ‘Cihêkarî vîrûsê jî guhdar nake: Mizgeft dezenfekte kirin lê cemxane û dêr dezenfekte nekirin’ nûçeyek amade kir. Sê meh piştî weşandina nûçeyê, serdozgeriyê bi boneya vê nûçeyê der barê Akdenîz de lêpirsîn da destpêkirin.

Midûriyeta Polîsan a Amedê bang li Akdenîz kir û xwest ku îfadeyê bide. Li ser vê yekê Akdenîz tevî parêzerê xwe çû emniyetê û îfade da. Piştî îfadeyê jî ji emniyetê derket. AMED