Dewleta tirk zêdetirî 25 hezar kes bêav hişt

Dijminatiya dewleta tirk a li dijî rojavayê Kurdistanê didome. Di vê çarçoveyê de rêjeya ava çemê Firatê ji sedî 60 kêm kir. Ji ber vê jî gelek herêmên Herêma Firatê bêav maye

Dewleta tirk û çeteyên wê piştî ku gelek deverên Bakur û Rojhilatê Sûriyeyê dagir kirin, rojane li sûcên xwe yeke din zêde dikin. Yek ji sûcên ku dewleta tirk û çeteyên wê li dijî herêmê dikin jî qutkirina avê ya li ser herêmê ye. Di vê çarçoveyê de di demsalên havînê de avê kêm dike û di demsalên bihar û zivistanê de jî ava çem zêde ber dide.

Yek ji herêmên ku ji vê kiryara dewleta tirk bibandor dibe jî bajarokê Sirîn ê li başûrê kantona Kobanê ye. Ji ber vê polîtîkaya dewleta tirk êdî li bajarok saetên dayîna ava vexwarinê hatine kêmkirin. Çavdêrên bendavên ku li ser çem hatine avakirin dibêjin ku dewleta tirk ji meha gulanê ve ji sedî 60 rêjeya ava çem kêm kiriye.

Têkildarî mijarê hevserokê Gerînendetiya Avê ya Sirînê Mihemed Xêr Dirxam axivî û wiha got: “Li bajarok her sal di havînê de şênî ji ber kêmbûna avê zehmetiyan dikişînin. Ji ber wê şênî bi gilî û gazinc in. Dewleta tirk polîtîkaya birçîkirinê li ser gelê herêmê dimeşîne.”

Ji ber vê kiryara dewleta tirk gelê herêmê ji neçarî avê ji sahrîcan peyda dikin ku bihayê wan zêde ye. Lê ev yek jî hewcehiyên welatiyan pêşwazî nake. Ji bo sivikkirina barê gel, gerînendetiya avê bi hevkariya Şaredariya Gel a Kobanê gelek gav avêtin. Tora kişandina avê fireh kir, veguhêreke ceryanê ji stasyona bajarok re anîn û hecma lûleyên ku avê digihînin zêde kirin. Dirxam jî da zanîn ku li wê bendê ne ku di nava mehekê de çareseriyê bibînin. KOBANÊ

Dikarî Biecibînî