‘Heke hikûmeta Başûr xeletiya xwe nebîne dê statûya Başûr ji dest biçe’

Endamê KNK’ê Kamûran Berwarî diyar kir ku heke desthilatdarên Başûr di xeletiya xwe de israr bikin dê statûya Herêma Kurdistanê jî winda bikin. Berwarî got: “Di plana li dijî kurdan Tirkiye û Iraqê li hev kiriye. Divê kurd jî xwedî stratejiyeke hevpar û hêzeke neteweyî bin.”

Endamê Kongreya Neteweyî ya Kurdistanê (KNK) û mamosteyê zanîngehê Dr. Kamûran Berwarî têkildarî êrîşên dewleta tirk ên li dijî başûrê Kurdistanê û siyaseta hikûmeta başûrê Kurdistanê ji Rojnewsê bi Botan Germiyanî re axivî.

Kamûran Berwarî diyar kir ku tiştekî bi navê hikûmeta Herêma Kurdistanê nemaye û wiha got: “Desthilatdarên Başûr nekarîn bi berpirsyarî nêzî êrîşan bibin û vê plana metirsîdar a Enqere, Bexda û Tehranê fam bikin. Rûdanên niha, encamên referandûma Barzanî ye ku bû sedem Hikûmeta Herêmê gumrig, sînor, aborî, ewlehî û serweriya xwe ji dest bide. Ger siyaseta xwe ya xelet bidomînin, dê statûya Herêma Kurdistanê jî winda bikin.”

Plana hevbeş a hêzên dagirker

Bi domdarî jî Berwarî anî ziman ku di sed salên borî de Sûriye, Iraq, Tirkiye û Îranê her tim li dijî gelê kurd û tevgerên rizgarîxwaz ên gelê kurd dijminatî kirine û wiha domand: “Ji bo dagirkirina herêmê niha jî plan û lihevkirineke wan a hevbeş heye. Dixwazin li dîrokê vegerin. Bi taybet jî li gorî bername û stratejiya wan dê dewleta tirk û hikûmeta Iraqê sînor kontrol bikin û bihevre li dijî tevgera azadîxwaz a kurd şer bikin.”

Banga avakirina hêza kurdistanî

Herî dawî jî Kamûran Berwarî ev tişt destnîşan kir: “Ger em xwe neparêzin û hêza me nebe, tu destkeftiyeke me dê nemîne. Pêwîste desthilatdarên Başûr ji stratejiya xelet a 100 salên borî nedomîne. Divê xwedî stratejiyeke neteweyî bin û hêzeke kurdistanî ava bikin. Her wiha divê serokomarê Iraqê Berhem Salih jî weke kurdekî erk, berpirsyariyên xwe yên neteweyî, exlaqî û mirovî pêk bîne. Divê bibîne bê ka li Kurdistanê rojane çiqas jin, zarok û ciwan şehîd dibin û çiqas gund tên şewitandin û valakirin.” SILÊMANIYE