Rejîma Îranê Zeyneb Celaliyan careke din sirgûn kir

Rejîma Îranê vê carê jî girtiya siyasî ya kurd Zeyneb Celaliyan sirgûnî Girtîgeha Kêrmanê kir. Hevalên Celaliyan ên girtîgehê ragihandin ku rewşa tenduristiyê ya Celaliyan nebaş e

Navenda Nûçeyan |

Rejîma Îranê aktîvîsta jin a kurd Zeyneb Celaliyan dema di 21’ê gulanê de ji Girtîgeha Xoyê sirgûnî Girtîgeha Qereçekê kirin, Celaliyan bi şewba koronayê ketibû. Celaliyan ji ber nedermankirinê û şertên giran ên girtîgehê, di 21’ê hezîranê de dest bi greva birçîbûnê kiribû.

Xizmên Zeyneb Celaliyan têkildarî rewşa wê agahî dan Komeleya Mafên Mirovan a Kurdistanê (KMMK) û da zanîn ku Celaliyan di 27’ê hezîranê de ji Girtîgeha Qereçekê sirgûnî Girtîgeha Kêrmanê hatiye kirin.

Suheyla Hicabî ya li gel Celaliyan di heman girtîgehê de dima, rojên borî ragihandibû ku rewşa tenduristiyê ya Celaliyan xirab bûye.

Hêjayî bibîrxistinê ye ku Zeyneb Celaliyan (38) ku jineke aktîvîst a ji Makuyê ye, bi îdiaya ‘endama partiyeke kurd e’ cezayê heta heta yê girtîgehê lê hatiye birîn. Celaliyan ev 13 sal in jî girtî ye.

Dikarî Biecibînî