‘Li nexweşxaneyan cih nemaye’

Seroka Odeya Tabîban a Amedê Elîf Turan bal kişand talûkeya vîrusa koronayê ya beriya ku dibistan vebin û wiha got: “Li nexweşxaneyên herêmê cih nemaye. Tenê dema yek mir an jî yek sax bû cih dikare bê dîtin.”

Li bakurê Kurdistanê vîrusa koronayê her ku diçe zêde zêde belav dibe. Ji ber hêjmara nexweşên şewbê zêde dibe êdî cih di nexweşxaneyan de tunene. Gelek nexweş diçin nexweşxaneyê, lê ji ber cih tune dîsa paşve vedigerin. Têkildarî rewşa vîrûsê û rewşa herêmê Seroka Odeya Tabîban (DTO) ya Amedê Elif Turan nirxandin kir.

Turan diyar kir ku hêjmara nexweşên bi şewba vîrusa Covid-19 ketine pir zêde bûye û wiha got: “Bi taybetî piştî dibistan vebin dê zêdetir bibe. Hem demsala zekemê hem jî vebûna dibistanan dê ev talûke mezintir bibe. Divê her kes teqez rûpoşên xwe (maske) girê bidin. Divê rûpoş dev û difin bigirin. Divê her kes li paqijiya dest baldar bin. Li malên hêjmar zêde divê rûpoş bidin ber devên xwe. Rast e hewa germ e lê divê her kes rûpoşê li ber dev û pozê xwe girê bidin. Li dibistanên dewletê hêjmara polan 50-60 kes in. Ev hêjmar pir zêde ye. Divê hêjmar bê kontrolkirin. Hem vekirina dibistanan hem jî demsala zekemê nêzîk dibe. Ev rîsk û talûkeyê zêdetir dike.”

Turan xwest hem welatî û hem jî rayedar baldar tev bigerin û ev tişt anî ziman: “Şerîf Yildiz bi Covid-19 ket û jiyana xwe ji dest da. Li nexweşxaneyên 5 bajaran geriya. Lê cih nedît. Li nexweşxaneyên herêmê cih nemaye. Tenê dema yek mir an jî yek sax bû dikare bê dîtin.”

Li Amedê rojê 300 kes û li Rihayê rojê 300 – 350 kes bi şewba vîrûsê dikevin. AMED  

Dikarî Biecibînî