aram

‘Divê ciwanên Başûr ji bo azadiya Rêber Ocalan dakevin qadan’

Meclisa Ciwanên Welatparêz a Kerkûk û Silêmaniyê bi daxuyaniyekê piştgirî dan pêngava ji bo azadiya Rêberê Gelê Kurd Abdullah Ocalan dibin û bang li ciwanên Başûr kirin da ku ji bo azadiya Ocalan û dijî dagirkeriyê li her derê rabin ser pêyan

Têkildarî pêngava ‘Bes e ji tecrîd, faşîzm û dagirkeriyê re; dem dema azadiyê ye’ ya KCK’ê, komek ji Meclisa Ciwanên Welatparêz a Kerkûk û Silêmaniyê daxuyaniyek çapemeniyê dan.

Di daxuyaniyê de tecrîda 21 salan a li ser Rêberê Gelê Kurd Abdullah Ocalan hate bibîrxistin û hate ragihandin ku li gel tecrîda li Îmraliyê polîtîkaya qirkirinê li ser tevahiya Kurdistanê tê ferzkirin.

Ciwana diyar kirin ku Ocalan bi fikir û felsefeya xwe pergal û jiyaneke nû ji bo mirovahiyê diafirîne û wiha gotin: “Vê yekê hêzên hegemonîk û statukoparêz tirsand. Dewletên ku li ser pişta gelan desthilatdariya xwe ava kiriye, ji hebûna Rêber Apo ditirse. Ji ber vê yekê tecrîda girankirî ya Îmraliyê roj bi roj li ser Rêber Apo tê şidandin. Tecrîd li ser ciwan, jin, dayik, zarok, pîr hwd. bi şêwazên cûr be cûr tê rêvebirin. Tecrîd bi esasî navenda şer û qirkirinê ye. Dagirkeriya tirk hemû hêz û nêrînên xwe ji wir digire. Li ser vê yekê, êrîşê dibe ser her devera Kurdistanê. Êrîşî çand, ziman, axa me dike. Têkbirina tecrîdê bidawîkirina dagirkeriya tirk e.

Em ciwan û jinên ciwan ên başûrê Kurdistanê didin diyar kirin ku tecrîda li ser Rêber Apo li ser kurd û Kurdistanê ye. Ji ber vê yekê em qebûl nakin û li dijî tecrîdê em ê têkoşîna xwe bilindtir bikin.

Em tevlibûna xwe ya pêngava KCK’ê ya ‘Bes e ji tecrîd, faşîzm, dagirkeriyê re, dem dema azadiyê ye’ ji vir didin diyar kirin. Em wek ciwan û jinên ciwan ên başûrê Kurdistanê bi şîara ‘Bi ruhê Cenga Heftanînê Dagikeriyê Têk Bibe, Kurdistanê Biparêze’ tev li pêngava ji bo azadiya Rêber Apo dibin.”

Di dewama daxuyaniyê de bang li hemû ciwanên Başûr hate kirin da ku ji bo azadiya Rêberê Gelê Kurd li dijî tecrîd û dagirkeriyê li her navçe û bajaran dakevin qadan û çalakiyan bikin. Herî dawî carek din bang li ciwanan hate kirin ku divê hemû ciwan rola xwe ya pêşengiyê ji bo têkbirina dagirkeriyê û parastina Kurdistanê bi cih bînin. KERKUK

Dikarî Biecibînî