Leşker YSK’ê tehdît dikin

Kadrî Esen / Amed

Lijneya Bilind a Hilbijartinê ya Pîranê bêyî ku hincet nîşan bide bi civînekê biryara veguhastina sindoqên 11 gund û mezrayên navçeyê da. Tê angaştkirin ku serdarekî jî beşdarî civînê bûye û ji bo qebûlkirina biryarê gef li nûnerên partiyên siyasî yên beşdarî civînê bûne xwariye

Desthilata AKP/MHP’ê ku dikin û nakin nikarin dengê xwe li bakurê Kurdistanê zêde bikin, ji bo kêmkirina dengê HDP’ê bi rêya Lijneya Bilind a Hilbijartinê (YSK) serî li rêbazeke nû dan. Derket holê ku Lijneya Bilind a Hilbijartinê ya Pîrana Amedê di 8’ê sibatê de li navçeyê civînek li dar xistiye û biryar daye ku di bin navê ‘komkirinê’ de weke hilbijartina 24’ê hezîranê sindoqên 11 gund û mezrayan bên veguhastin.

Piraniya gundên ku biryara veguhastina sindoqên wan hatiye dayîn dê hilbijêrên wan li Lîseya Necatî Ceylan a li navenda navçeyê dengê xwe bi kar bînin. Hilbijêrên çend gund û mezrayan jî dê ji bilî lîseyê li hin gundên din dengê xwe bi kar bînin. Gund û mezrayên biryara veguhastina sindoqên wan hatiye dayîn ji 5’an heta 22 kîlometreyan dûrî navendên ku hatine diyarkirin in. Li van gund û mezreyan bi giştî 3 hezar û 494 hilbijêr hene.

Dengê AKP’ê kêm e

Berpirsyarê Kirariya Zanyarî û Karên Hilbijartinê yê HDP’a Amedê Edîp Bînbîr têkildarî mijarê axivî û diyar kir ku piştî bi vê yekê hesiyane, serî li YSK’ê dane û li biryarê îtiraz kirine û wiha got: “Di 24’ê hezîranê de jî serî li rêbazên wiha dabûn. Lê bi hinceta ewlehiyê. Niha ev jî tune, tu hincet nehatiye destnîşankirin. Gund û mezrayên biryara veguhastina sindoqên wan hatiye dayîn dengê AKP’ê li wan gelekî kêm e.”

Bînbîr di berdewamê de destnîşan kir ku di civînê de biryar bi piraniya dengan hatiye wergirtin û tenê nûnerê wan ê navçeyê di civînê de li dijî biryarê derketiye û wiha got: “Ji ber ku ji bo biryareke bi vî rengî tu serlêdan tune ye, di rewşên wiha de nikarin biryarên bi vî rengî bên wergertin. Lê li gel vê yekê jî YSK’a navçeyê biryareke wiha sosret girtiye. Ji ber vê biryarê her wiha dê li herêmê di hilbijartina keyatiyê de aloziyên mezin derkevin.”

Serdar jî tev li civînê bûye

Li aliyê din ji aliyê hin çavkaniyên navçeyê ve hat angaştkirin ku serdarekî navçeyê jî bi awayekî bêqanûnî beşdarî civîna navborî bûye û di civînê de ji bo qebûlkirina biryarê gef li nûnerên partiyên siyasî yên beşdarî civînê bûne xwariye. Her 11 gund û mezrayên ku biryara veguhastina sindoqên wan hatine dayîn nav, nimreya sindoq û hejmara hilbijêrên wan wiha ne;

Gund                             Nimreya Sindoqê                    Hejmara Hilbijêran

Beyrûboxaz              1020                                          346

Xelefan                       1040                                           99

Zixir                              1031                                          132

Gozelî                          1021                                           97

Kelkom                       1044                                          191

Ersek                            1037-1038                            455

Hurî                              1072                                          233

Kufar                           1013                                          327

Akrak                           1019                                          152

Şêxmalan                  1068-1069                            575

Verdan                        1016                                          787

 

Dikarî Biecibînî