Namzetên HDP’ê di qezenckirina şaredariyan de bi israr in

Navenda Nûçeyan

Di çarçoveyên xebata hilbijartinê de namzetên HDP’ê diçin serdana esnafan, pirsgirêk û daxwazên wan guhdar dikin

Di çarçoveya xebatên hilbijartinên herêmî de ziyaretên endam û rêveberên HDP’ê didomin.

Namzetên HDP’ê yên Hevşaredarên Agiriyê Yelîz Karaaslan û Abdurrahman Dogan, esnafên Cadeya Cumhuriyetê ziyaret kirin. Serdan bi lêxistina dahûl û zirnê pêk hat. Parlamenterê Agirî Abdullah Koç û Dîlan Dîrayet Taşdemîr beşdarî ziyaretê bûn. Namzetê Hevşaredrên Agirî Abdurrahman Dogar li ser Cadeya Tahîr Elçî daxuyaniyek kurt da û wiha got: “Ji bo azadî, wekhev û edaletê divê hemû kes xwedî li HDP’ê derkevin. Roj roja wêrekiyê ye. Vîna vî gelî xesp kirin û dest danîn ser vîna gel. Di 31’ê adarê de, em ê li vê qadê guvenda herî mezin bigerînin.”

Pirsgirêkan guhdar kirin

Namzetên HDP’ê yên Westanê yê Wanê Melek Arapoglu û Veysî Şeker jî, bi endamên meclisê û xebatkarên şaredariyê re li hev civiyan. Namzetên bi xebatkerên şaredariyê re li hev civiyan, pirsgirêk û daxwazên personelan guhdar kirin.

Namzetan dûre Serokatiya Daîreya Daristan û Çêkirina Rê û Serokatiya Daîreya Agirkuj ên girêdayî Şaredariya Bajarê Mezin ên Wanê ziyaret kirin. Namzetê Hevşaredarê navçeyê Veysî Şeker li her du daîreyan axivî û wiha got: “Divê êdî Westan bê hilpekîn û ji nû ve şîn bibe. Ji bo vê jî ferasetek cuda pêwîst e. Em ê bi vê ferasetê, bi awayekî hevpar bi hevre bixebitin.”

Di çarçoveya serdanên hilbjartinê de namzetê HDP’ê ya Bajarê Mezin ê Meletiyê Yûsûf Bozkuş esnaf û welatiyên sîteya Pîşesaziya Biçûk û Bazar a Genim a taxa Çavûşoglû ya navçeya Çermiktî ziyaret kir.

‘Em ê bi gel re Qersê veguherînin’

Namzetên HDP’ê yên Hevşaredarên Qersê Şevîn Alaca û Ayhan Bîlgen, projeyên xwe yên têkildarî bajêr aşkera kirin. Civîna danasîna projeyan a hevşaredaran li buroya hilbijartinê ya li taxa Şehîtler hat lidarxistin. Namzetên HDP’ê, rêveber û endamên partiyê û gelek welatî beşdarî civînê bûn.

Namzeta Hevşaredariyê Şevîn Alaca di civînê de axivî û wiha got: “Ji bo guhertin û veguhertinê em ketin rê. Em ê bajarê xwe nû bikin. Karê me pir zêde ye. Li Qersê kar pir zêde ye. Em ê hemû sozên xwe bi cih bînin. Gelê Qersê dê vê yekê bibîne; Em ê her tiştê xwe li ber çavê gelê xwe bikin. Adresa hêviyan HDP ye.”

Namzet Ayhan Bîlgen jî bal kişand ser projeyên xwe û ev tişt anî ziman: “Bajêr karên herî lezgîn û divê bên kirin dixe rojeva xwe. Em ê pirsgirêkên rê, av, çop û binesaziyê bikin karê xwe yê destpê kê. Dîsa pirsgirêka plansaziya avdan û bajêr heye. Di çareserkirina vê pirsgirêkê de em ê, biryarê ji gelê Qersê re bihêlin. Ev plansaziya me ya hevpar e. Dîsa em ê potensiyela çandinî û turîzma bajêr bixin nava tevgerê. Em ê projeyên xwe yên bajêr xweş bike pêş bixin.”

Piştî axaftinan namzetên hevşaredariyê yek bi yek projeyên xwe rêz kirin.

Li Edenê HDP’î bi çapemeniyê re civiyan

HDP a Edeneyê jî bi endamên çapemeniyên yên bajêr re civiyan. ParlementeraHDP’ê Tulay Hatîmogullarî ya beşdarî hevdîtinê bû, pêvajoya siyasî nirxand û bal kişand ser xebatên hilbijartina herêmî. Hatîmogûllari diyar kir ku ligel krîza aborî li welat, krîzên siyasî û civakî yên mezin tên jiyîn û wiha axivî: “AKP bi siyaseta gefê, polîtîkayê birêve dibe. Qeyûm tayînê şaredariyên herêmê kirin. Lê em ê li gel şaredariyên xwe şaredariyên nû jî qezenc bikin. Li Edeneyê hemû hêzên demokratîk dê dengê xwe bidin namzetê hevbeş. Dê tifaqa Cumhur winda bike û em ê li her qadê qezenc bikin.”

Dikarî Biecibînî