HDK: Gelê me ji pergala faşîzmê re got ‘raweste’

HDK’ê bi daxuyaniyeke nivîskî ragihand ku bi hilbijartina Stenbolê re derket holê ku tu rewatiya pergala serokomariyê nîne û bloka AKP-MHP’ê li hemberî vîna gel têk çûye. HDK’ê da zanîn ku rêya aştiya Tirkiyeyê di Îmraliyê de derbas dibe

Kongreya Demokratîk a Gelan (HDK) têkildarî hilbijartina 23’yê hezîranê ya Şaredariya Bajarê Mezin a Stenbolê daxuyaniyeke nivîskî bi raya giştî re parve kir. HDK’ê di daxuyaniyê de destnîşan kir ku bloka AKP-MHP’ê di hilbijartina 31’ê adarê de bi destê YSK’ê darbe kir û hilbijartina Stenbolê dubare kir.

Di berdewamê de jî HDK’ê daxuyand ku bloka AKP-MHP’ê di serî de gotin; ‘Pirsgirêka bekayê heye’ û ‘Ev hilbijartin erêkirina pergala hikûmetê ya serokomariyê ye.’ HDK’ê wiha domand: “Bi hilbijartina Stenbolê re xwestin vê pergalê rewa bikin. Lê hêviya wan têk çû. Bloka îktîdara AKP-MHP’ê niha bûye mijara nîqaşê. Cara duyemîn e ku gel ji rejîm û pergala serokomariyê re dibêje ‘raweste’. Desthilata AKP-MHP’ê li hemberî vîna gel a Stenbolê têk çû. Gel bi rêjeyeke mezin ji talankirin û wêrankirina Stenbolê re got bes e.”

‘Gelan ji faşîzmê re got raweste’

HDK’ê diyar kir ku gelê Stenbolê bi hilbijartinê re ji pergala yekzilamî re gotiye raweste û wiha berdewam kir: “Gelan li dijî pergala faşîzmê helwest û daxwaza xwe nîşan daye. Bloka AKP-MHP’ê li gelek bajaran şaredarî winda kir. Şaredariyên bajarên mezin winda kirin. Bi vê yekê re bloka AKP-MHP’ê û Tayyîp Erdogan êdî rewatiya xwe winda kirin. Gelê me li dijî polîtikayên şer, terora dewletê, krîza aborî, betalî û astengiyên li pêş azadiya îfadeyê helwesta xwe nîşan da.”

Pêdiviya bi fikrên Ocalan

Di dawiyê de jî HDK’ê ev tişt parve kirin: “Daxwaza gel pêk hat. Rêya aştiyê di Îmraliyê re derbas dibe. Piştî tecrîda 8 salan a li Îmraliyê, bi têkoşîna Leyla Guven, girtiyan ketin greva birçîbûnê û hemû dayikên laçik spî di 2’yê gulanê de deriyên Îmraliyê li parêzeran re vebûn. Pêdiviya gel a bi fikrên birêz Ocalan, bi van hevdîtinan careke din derket holê. Divê gelê me li dijî faşîzme, têkoşîna aştî, edalet wekhevî, demokrasî û azadiyê bilindtir û xurtir bike.” STENBOL

Dikarî Biecibînî