Dadgehê 9 sal û 8 meh ceza da Canan Kaftancioglu

37’emîn Dadgeha Cezayên Giran a Stenbolê bi hinceta parvekirinên medyaya civakî, 9 sal û 8 meh û 20 roj cezayê girtîgehê li seroka CHP’ê ya Stenbolê Canan Kaftancioglû birî

Der barê seroka CHP’ê ya Bajarê Stenbolê Canan Kaftancioglu de bi hinceta parvekirinên medyaya civakî yên di salên 2012-2017’an de, bi îdiayên ‘Heqaret li serokomar kiriye’, ‘Ji ber karê ku dike heqaret li xebatkarê cemaweriyê kiriye’ , ‘Biçûkxistina Dewleta Komara Tirkiyeyê’, ‘Gel ji bo kîn û dijminatiyê sor kiriye’ û ‘Propagandaya rêxistinê kiriye’ doz hatibû vekirin. Ji ber van îdiayan jî heyeta dadgehê ji 4 sal û 10 mehan heta 17 salan cezayê girtîgehê dixwest.

Danişîna doza Kaftancioglu ya îro li 37’emîn Dadgeha Cezayên Giran a Stenbolê hate dîtin. Di danişînê de dadger gotina dawî ji Kaftancioglu pirsî û wê jî wiha bersivand: “Ev ne gotina min a dawî, bila ya yekemîn be. Encam çi dibe bila bibe, ez ê ji gotin û fikrên xwe paşde gav neavêjim. Li hundir an jî li derve, li ku dibe bila bibe ez ê ji dev ji xeyalên xwe bernedim. Tu caran dê nebe gotina min a dawî. Demsala me dest pê kir. Wî winda kir. Em, 80 milyon bi ser ketin.”

Piştre jî heyeta dadgehê ji ber îdiaya ‘Propagandaya rêxistinê kiriye’ salek û 6 meh, ji ber îdiaya ‘Ji ber karê ku dike heqaret li xebatkarê cemaweriyê kiriye’ salek û 20 roj, ji ber îdiaya ‘Heqaret li serokomar kiriye’ 2 sal û 4 meh, ji ber îdiaya ‘Dewlet biçûk xistiye’ salek û 8 meh û ji ber îdiaya ‘Gel ji bo kîn û dijminatiyê sor kiriye’ jî 2 sal û 8 meh cezayê girtîgehê da Kaftancioglu. Bi giştî jî 9 sal û 8 meh û 20 roj ceza li Kaftancioglu hate birîn. Heyeta dadgehê ji bo cezayê hate birîn biryara paşdexistinê neda. STENBOL

Dikarî Biecibînî